دقت الساعه

دقت الساعة**** دقت الساعة.. وبدأت المحاضرة
والكل فتح الكتاب
سكت الكلام عن أخره
وبدأ الزمان يتكلم.....
عن الحب والأصحاب
وفتح معانا.. أول صفحات الكتاب
وبدأ يحكى.. رحلة ألم وعذاب
من أول حقيقة الكون
وبداية الحب والأحباب
وكل واحد كان صادق،
حب بمشاعره وداب
غرقان فى حبه....
نفسه يوصله للسحاب
لكن خسارة............
(ضحى بحياته..)
علشان مخادع كداب.
قلت لنفسى ..معقولة،
الحقيقة ادبدلت بسراب
ياااااااه...اخرة الحب العذاب

بدأ الزمان يقلّب
حكايات كتيرة فى الوجود
عن كل صاحب باع صحبه ،
وبدل وخان الوعود
عن دنيا غدارة مليانة
عقارب وتعابين ودود
فيها ناس زى الوحوش
وقلوبها اسية من غير حدود
فى عالم غريب..أنا فيه غريق
نفسى أسأل ميت سؤال
لكن خسارة....من غير ردود.

خايف من نفسى وحاسس
انى واقفه ورا باب مقفول
مستنيه يأذنلى بالدخول
لكن أشكى لمين وأقول
ده أنا عايش غريق فى أحلام
بصيت لصاحبى بعنيه....
نظرة عتاب وملام
ومسكت قلمى الرصاص
وكتبت ،كل كلمة قالها الزمان
لكن خسارة ..كله اتمحى
وضاعت سنينى فى الايام

حاولت ألحق نفسى
قبل مايفوت الأوان
ومسكت قلمى الجاف من وسطه
وكتبت من تانى الكلام
بليت القلم من دمى
وكتبت..حرام عليكى يأحلام
لو هاتخلينا ننسى نفسنا
وتملى حياتنا أوهام
كفاية..اخرجى وسيبينا لوحدنا
نعيش فى محبة وسلام
يمكن نلاقى نفسنا
وننسى كل الأحزان
ونعيش حياة حلوة
وتضحك لنا الأيام
وبدأ الكل يسكت
ويسمع صوتى انا
وينسى صوت الزمان

وبكدة تنتهى القصة
وسنين فى الماضى وبكرة
درس ومدرس ومحاضرة
مكتوبة فى كشكول وكتاب
دقت الساعة......
وانتهت المحاضرة
والكل قفل الكتاب.

اهداء الى:

الى كل انسان مخادع.......
الى كل من اتخذ من الكذب وسيلة للنجاح.....
الى كل من سولت له نفسه أن يتلاعب بقلب انسان ، أو يحطم أحلام انسان...........،
اذا
كنت بدأت حياتك بكذب أو خداع تتوهم انه يفيد أو يصل بك الى طريق
النجاة....، فما الفائدة اذا كنت خدعت نفسك أولا بهذا الكذب ، فأجبرت كل
من حولك على خداعك.
انتبه.......
فانه من يشعل النار هو أول من يحترق بها

بجد روعه يا سما
ميرسى جدا ع التوبيك الجامد ده

nice topic

thanks