مش هسيبك تخلعينى..على ايه جايه تلومينى

مش هسيبــِك تخلعينى

على إيه جَيّه تلومينى
دا انتِ حقــِّـك تشــكرينى

زعلانة انى بعدت عنك
ما انت زمان طلـّعْـتى عينى

على إيه جَيّه تلومينى

********

كل شئ جايز بالخناق
إلا الغــرام بالاتفــاق

حلفت براس عــلاء
إنك مش هتشــوفينى

على إيه جيّه تلومينى

******

فاكرة أيـــام الخطوبـــة
لما كنتى ف شهر طوبة

يا إما نروح نفق العروبة
يا إما بالطوب تبطحينى

على إيه جَايّه تلومينى

********

لو خرجنا تغـَرَّمِـينى
ولو قعدنا تبَسْــتـِفينى

ولما أقوللِك إرحمينى
ألاقى شبشب جاى ف عينى

على إيه جَيّه تلومينى

********

لو جبتلك ف يوم زيارة
عود قصب وكام خيارة

تعمليلى ألف غـــارة
وف الحوارى تفضحينى

على إيه جَيّه تلومينى

********

ولو مسكت إيديكى تِهْرِى
ولو نـَدَهْت عليكى تجرى

وتقوليلى آه ياضهرى
وتستخبـّى وتسيبينى

على إيه جَيّه تلومينى

********

وف الفرح والناس سعيدة
وكنتْ بالبدلة الجديدة

ألقاك ماسكالى حديدة
كنتِ نفسِك تضربينى

على إيه جَيّه تلومينى

********

رجعت بدرى ف يوم خميس
نفسى أحس إنى عريس

لقيت ف إيدِك عود سِريس
وهات يا أكل وتطنشينى

على إيه جَيّه تلومينى

********

وبعد الفرح بتلات شهور
روّحْت ومعايا عودين زهور

شخطتى فىَّ ياعم غور
قلتلك ليـه بتكرهـينى

على إيه جَيّه تلومينى

********

وبـعد سـبع سـنيـن خلـِّــفـت
كنت يوماتى بتغدّا لفت

وياريت عاجب تقوليلى يازفت
إمشى غور لحْسَنْ ودِيـنى .....

على إيه جَيّه تلومينى

********

و ع الحال ده سنين طوال
كنت بتنامى زى الشوال

قلتْ انام جنب العيـــال
عشان ليلاتى بتِسْرعينى

على إيه جَيّه تلومينى

********

أخدت سُلفة من صديقى
وقلتـلـِك بالله عليــكى

نفسى أكلـَـة من إيديكى
كنت عايزة تعوَّرينى

على إيه جَيّه تلومينى

********

دا انتِ عيشتِك بالخسارة
مابتفهميش زى الحمارة

معندكيش غير البصارة
تعمِـلى وتأكـّلـِيـــنى

على إيه جَيّه تلومينى

********

لو طبخنا طبخة عـِدْلـَة
قرنبيط أو حتى رجْلـَة

أو عملتى صحن عِجـَّة
تبقى عايزة توزّعينى

على إيه جَيّه تلومينى

********

كل حى يروح لحالـُه
وكل واحد يهدا بالـُه

والغرام لمِّيت عِزَالـُه
وهريَّحِك وتريَّحيــنى

على إيه جَيّه تلومينى

********

نويت خلاص أقول يافكيك
واخلص منـِّك بطريقة شيك

كده اهُو ومن غير تـَمَاحِـيك
ومش هسيبك تخلعينى

على إيه جَيّه تلومينى

********

هاخدلى واحدة زى سوسو
تحفظ للراجل فلوسـُـه

ولو ف يوم حَنطور يدوسـُه
تقول دا بعلى وكان شارينى

وماتجيش تانى تلومينى

ميرسى يا يويو على التوبيك الجميل
تسلم ايدك

هههههههههههه
على ايه بس بتلومه
الراجل تعب و الله

تسلم ايدك يا قمر

ههههههههههههههههه

على فكره الراجل ده كداب

وميرسى لمروركم

نورتواااا