يعني إيه ريجيم؟؟

بسم الله الرحمن الرحيم

ازيكم يا جماعه.. أتمنى يكون جميع الأعضاء بيتمتعوا بصحة كويسه ومافيش مشاكل

الموضوع ده انا عملتو عشان أصلح فكره غلط عند معظم الناس

اللي هيا.. "مفهوم الريجيم" أو "مفهوم الحمية"

أغلب الناس معتقده إن الريجيم هوا انك تعرف ازاي تخس وبس....................

الحقيقة ان الريجيم مش تنقيص وزن وبس... الريجيم تزويد كمان

بعد أما عملت بحث في جوجل ولقيت أغلب الناس فاهمه الموضوع غلط.. قرأت فيه شويه.. ووصلت لتعريف للريجيم.. هوا مش تعريف علمي عشان ماحدش يجي يقولي فين الكتاب

يعني هوا استنتاج شخصي من خلال ما قرأت

الريجيم أو الحميه هيا ببساطة نظام غذائي يتم فيه حساب عدد السعرات الحرارية اللازمة للجسم يوميا.. والعدد ده بيختلف من شخص لآخر.. فا مفيش حاجة اسمها ريجيم الدكتور الفلاني.. أو المجلة الفلانيه.. ايوه في حاجات كلنا مجتمعين انها ليها تاثير واحد على الجميع.. بس في نظم بتبقى خطأ 100% لان زي ما قلت كل شخص ليه نظام بيختلف عن الشخص التاني..

والريجيم مش يعني أنا عندي وزن زياده وعايز أخس وبس .. الريجيم ممكن يكون انا رفيع ومحتاج وزن زياده.. والوزن الزياده ده مش شرط يجي بأكل كل حاجه تشوفها قدامك ونأتي على الأخضر واليابس عشان نزيد.. لا.. هوا نظام.. في كلا الحالتين سواء عاوز تخس أو تزيد فهوا نظام انت بتمشي عليه.. مش بتقف يعني.. بتمشي اوك اوك.. نرجع لموضوعنا..

طبعا الجميع متفق على إن السعرات الحرارية الكتير بتزيد الوزن.. والعكس صحيح..

و متفقين برضو على ان الحميه شئ ضروري عشان نفضل في الرينج او الحدود الافضل لوزن مثالي وحياه ابعد عن امراض احنا في غنى عنها..

عشان كده لازم كل واحد فينا يكون عندو حميه.. او على الاقل لو هوا حاليا مش بيعاني من المشاكل يحاول ينظم موضوع الأكل شويه.. ويبدأ يراقب هوا بياكل ايه..

طبعا الأكل لازم يكون صحي.. مش هزود وزني بالتيك اواي مثلا وأكل المطاعم والكوسه دي.. ( التيك اواي بيزود الدهون يعني بيزود الوزن بشكل غير صحي )

يعني لازم الأكل يكون نضيف

اتنين.. لو كنت بتعاني من مشاكل.. زيادة وزن أو نقصان وزن.. فمن أفضل الطرق انك تروح لاستشاري وتسال.. لان في بعض الاحيان بيكون السبب مش بس نظام الاكل.. مرات بيبقى الموضوع عضوي.. او نفسي..

ولو انت متاكد\متاكده ان سبب الموضوع هوا نظام الاكل اللي انت ماشي عليه
فا انا بنصحك انك تراقب عدد السعرات الحرارية اللي بتاكلها كل يوم..

هاتقلي ازاي اعرف عدد السعرات في الاكل

ان شاء الله هانزل الكلام ده في موضوع قريب ويتثبت..

آخر حاجة عشان انا طولت عليكم.. هيا انك لازم تراعي انك تاكل أكل منوع ومشتمل على المجموعات الغذائية الستة ( او الخمسة لو اعتبرنا الفواكه والخضراوات حاجة واحده) الأساسية المبينة في الهرم الغذائي:

بس وكده خلصنا النهارده وقفلنا.. يلا بيتك بيتك ..اتمنى الموضوع يكون أفادكم

ودمتم...

» ريجيم مضمون
» ريجيم الماء
» ريجيم كيميائى
» لماذا الحب يعني الحزن؟!